Psalms 55

Te Devitgo asęani balia po me deli dao.

Bidigo abagigo aga dali dwai sę ebaso, agai gedu haluasa po wai

1God, nago eno gedu haluasa
po wabo odao.
Nago eno gela wabode olo me pania sigio.
 2Ae, nago eno gedu haluasa po bugagia odolama,
tama enaba po wei ponao.
Te sęgęgo ena mu dolainu ebo dao.
 3Te boi bidi dabego ena dolabo po bomo mu yai.
Te dwai bidi dabego ena aiyaba mu elalu yali.
Tama tiyu, eno haliga te dwai sęgę mu yai.
Augwaligo te sęgę hauwa enaba muyu,
te wado po dali weyu yai,
tama augwaligo enaba boi bidi mu ebao.
 4Ena te augwalide wi umabo mu eyu,
tama ena isabo homu elama,
tama tego ena haliga sęgę mu ilibo dao.
 5Awe, ena wi mu elama,
tama eno tigi te didibili dwai mu ebao.
Te wigo ena aiyaba mu elaluai.
 6Tialima, eno te tama po wali,
“Hobede ya, te eno homugo
te ba dabego bogo tiwai sigi da homu yai.
Tama ena bola pelama, te toma nabo
pesage me deli gegelama,
tama ena tede dugulalu dabo homu ebao,” wali.
 7“Te ena digibulu mu bola pelama,
tama ena te bidi meni yai pesageba
mu bidigi paibao,” wali.
 8“Te ena asesa bola peyu,
tama geme duala sigi pelama,
bidabo pesage me deli gegelama, bidainu yaibao,
tama ena te bomai walide me tulubagede
geme duala selama, bidaibao,” wali.

9Eno suali, te bidi dabego te taun tomode hwįbo suali.
Tama tialima, Genuai Bidi, nago
augwaligo po kone tuą palumainu elama,
tama augwali mu silimainogo yao.
 10Te giligade me hulide augwali
te taun bagulali obo dąįde bilalu ebo dao.
Tama te taun we bidi dabego te
dwai sęgę sabo kolesaga ebo sę hauwa eyu ebo dao.
 11Te taun pedai tigidali badu te
bidi dabego gasa bidi dabe me,
doado bage dabe me doloyu ebao.
Te sunumi sesegede,
me te bidi sisinibo pesagede,
te bidi dabego te gasa bidi dabe aiyaba elalu ebao,
tama augwali tibo po ola mayu,
te augwaligo doado bage sainu ebo dao.
 12Te boi bidi me deligo po dwai
enabolo wagi sogo da, tagalao,
eno te agai wabo pogo sęgę bugagia toligi da.
Ma, ena wei isiąwai bidigo enaba
kęnę po wagi sogo da,
teda ena agade geme duala sabo usugi da.
 13Tiali goli, menio. Te nage naga dao.
Nage te eno polalubo abagi da,
tama nage te eno hai namu mu da.
Nago digi te dwai po wabo kolesaga ebo dao.
 14Polobadu da si hodobo biliyu,
tama po dali bugagia miyu, ela bilai,
tama te Godigo moni lotu be
tempelba te gasa bidi dabe dali peyu yali.

15Eno homugo te eno boi bidi dabego
haligade me, te augwa bede me,
te dwai kolesagago pągąnaluao.
Tialima, eno homugo
te augwali polo isimainu homu yai.
Te augwali bidibo elalubadi,
tama augwali te isibo bidi dabego
pesageba pomainu ebao.
 16Tiali goli, te Godigo ena tau somainu
te gedu haluasa po obao.
Tama aga digi ena ma saibao.
 17Te kigamude me,
te genuai giliga nanobode me,
te hulide me, te sęgę dabego ena dolobaso,
tama eno agaba gela wabo da.
Tama agai eno gedu haluasa po odoyu yaibao.
 18Te bidi hauwago ena dali hwįbao.
Tiali goli, ena me dolobeo.
Magi baso meni, Godigo ena tonaluyu,
tama ena ma odasa asaibao.
 19Polobadu mu God king bidali,
tama megi me aga te king bidibao.
Te aga digi eno gedu haluasa po wabo odama,
tama agai te boi bidi dabe
te hwįbode aiyaba elaluaibao.
Augwali te agade wi me isąwai,
tama tiyu, augwaligo te dwai sę ebo
kolesaga tagalogobeo.

20Eno te abagigo agai te
aga abagi dabe dali digi hwįani.
Tama agai te augwali dali polobadu
te dąų walali bomai po bolalio.
 21Te pedauwalide agai pusai po wali,
tiali goli te haligade agai te boi bidi enade elaluali.
Te agai pogo dago tabi nagame ilama bidibao.
Tiali goli, te po te bobobage bainat hwą
tiwai mu poa pelama, tama da togobao.

22Tigidali sęgę nago tolobao,
te nago Genuai Bidiba mao.
Te agai tolama,
tama te agai nage dąų walaibao.
Te agai te magi nai me deligo
te doloba pai bidi dabe dolomainu me iligobeo.

23Tiali goli God, te nago te bidi
ela mubo bidi dabe sela sąyu,
tama te tibo po wabo bidi dabe me sela sąyu elama,
tama augwali te dwai pesageba pelama,
tama augwali hagawaibao.
Te augwaligo bidabo sogo bodolu
te me elalubadi, tama te augwali isaibao.
Tiali goli, ena digi, teda eno konealubo homu nageba
mu sesemane kęą paibao.
Copyright information for MPS